आठवड्याचे समालोचन – २८ सप्टेंबर ते १ ऑक्टोबर – शिंक्याच तुटलं आणी बोक्याला फावलं

आधीच्या आठवड्याचं समालोचन वाचण्यासाठी इथे क्लिक करा 
mktandme-logo1.jpg
अहो काय सांगू तुम्हाला ! या आठवड्यांत मार्केटचा आणी माझा गोंधळच गोंधळ उडाला. सोमवारी टी व्ही चालू केला तर काहीच दिसेना. प्रथम टी व्ही बिघडला नाही याची शहानिशा करून घेतली आणी नंतर केबलवाल्याला फोन केल्यावर कळले की वायर तुटली आहे. त्यामुळे शेअरमार्केटचा सामना अर्धा लाईव आणी अर्धा रेकॉरडेड असा पहावा लागला. ठीक आहे करणार काय आलीया भोगासी !
गेल्या आठवड्यांत आणी या आठवड्यांत बरेच अपघात घडले. मार्केटच्या भाषेत काही कम्पन्यांचे शेअर्स अचानक काही बातमीमुळे फार मोठ्या प्रमाणावर पडले. VW (VOLKS WAGEN) च्या घटनेमुळे BOSCH, मदरसन सुमी हे शेअर्स पडले हे आपण गेल्या आठवड्यांत पाहिले. HCL TECH ने प्राफीट वार्निंग इशू केल्यामुळे या शेअर्सच्या किमतीत घट झाली.HCL TECHचे शेअर्स विकून मार्केटने टीसीएस आणी इन्फोसिस या शेअर्सची खरेदी केली असे वाटते.
L & T ने L & T इंफोटेक या सबसिडीरीचा IPO आणण्यासाठी DRHP सेबीकडे फाईल केले.L & T या कंपनीला Rs ५००० कोटींची ऑर्डर मिळण्याची शक्यता आहे. तसेच L & T ने त्यांच्या पॉलिसीप्रमाणे आज आपला चंडीगडमधील ELANTE MALL Rs १७८५ कोटींना विकला. ठरल्याप्रमाणे FMC आणी सेबीचे मर्जर झाले. मर्जरमुळे ‘OPTION’ मध्ये ट्रेडिंग सुरु होईल आणी त्याचा MCXला फायदा होईल असे वाटते.
ह्यूम पाईपला खूप मोठी ऑर्डर मिळाली. ऑर्डर मिळणे,त्याची अमलबजावणी होणे या गोष्टी नेहेमी घडणाऱ्या आहेत.पण काही काही ऑर्डर्स विचार करायला लावण्याएवढ्या खूपच मोठ्या असतात. या कंपनीची मार्केट कॅप (शेअर्सची संख्या x शेअर्सची किमत) जितकी त्यापेक्षा तिप्पट मोठी ऑर्डर मिळाली. त्यामुळे कंपनीच्या फायद्यामध्ये, EPS ( अर्निंग पर शेअर) मध्ये वाढ होईल असा अंदाज आल्याने शेअर्सची मागणी वाढली. DR REDDY’S आणी ऑरोबिन्दो फार्मा याच्या औषधाला USFDA कडून मंजुरी मिळाली. DR REDDY’S या आठवड्याचा मुख्य शेअर ठरला. जवळ जवळ Rs ३०० ने या शेअरच्या किमतीत वाढ झाली.
या आठवड्यांत साखरेचे शेअर्स वाढले. नाहीतरी सणासुदीच्या काळांत साखर जास्त गोड होतेच. परंतु जागतिक बाजारामध्ये साखरेच्या किमतीत वाढ झाली, मागणी आणी पुरवठा यांचे गणित बदलले दुष्काळामुळे उसाच्या पिकाला पाणी पुरवू नये असे धोरण सरकारने जाहीर केले त्यामुळे एकंदरीतच शुगर इंडस्ट्रीजला चांगले दिवस आले परंतु आपले खिसे मात्र भाववाढ झाल्यामुळे खाली होणार असे चित्र दिसते.
पर्यावरणाच्या प्रॉब्लेम्समुळे माईनिंग इंडस्ट्रीजचे शेअर्स कोसळले. एडीएजी ग्रुपची AGM (ANNUAL GENERAL MEETING) झाली त्यामध्ये RCOMM आणी सिस्टेमा यांच्या मर्जरवर भर देण्यांत आला. या वर्षाअखेर 4G लौंच होईल असे सांगितले. सध्या IDBIमध्ये सरकारचा स्टेक ७६% आहे तो कमी करून ४९% केला जाणार आहे आणी काही विशेष अधिकार देण्यांत येणार आहेत असे सांगण्यांत आले.
मंगळवारी बहुचर्चित रिझर्व बँकेची पॉलिसी जाहीर झाली.RBIने दिवाळीच्या आधीच मिठाई वाटली असे वाटले. ०.२५ बेसीस पाईंट रेट कटची अपेक्षा असताना RBI ने ०.५० बेसिस पाईंट रेट कट केला. SLR CRR मध्ये काही बदल केला नाही. अर्थव्यवस्थेचे योग्य निदान करून वेळेवर औषधही दिले आणी टोनिकही दिले पण हे औषध वेळेवर घेतले जाईल याचीही खबरदारी घेतली. बँकांनी त्यांचे कर्जावरील व्याजाचे दर कमी केले पाहिजेत असे कडक शब्दांत सुनावले. त्यामुळे स्टेट बँकेने ताबडतोब एक्शन घेवून ०.40 बेसिस पाईंट रेटकट केला. सगळ्या बॅंका काही प्रमाणांत कां होईना आपले कर्जावरील व्याजाचे दर कमी करत आहेत. पण त्यामुळे मुदत ठेवींवर दिले जाणारे व्याज सुद्धा त्या प्रामाणात कमी होईल. उद्योगधंद्याला स्वस्त कर्ज पुरवठा होईल पण सामान्य लोकांना मुदत ठेवीवरचे व्याज कमी झाल्यामुळे त्याचा फटका बसेल.नेहेमी असेच घडते समाजातील एका वर्गाचा फायदा होतो तर एका वर्गाचे नुकसान होत असते.
जसे शिंके तुटले तर त्यांत ठेवलेले दही लोणी खाली सांडते आणी बोक्याची मेजवानी होते या घटनेमुळे अर्थातच मार्केटमध्ये नाच सुरु झाला. मार्केट थोडावेळ तेजींत आले पण पुन्हा पडू लागले. कारण नुकतीच रिझर्व बँकेने स्माल बँक, पेमेंट बँक्स याना दिलेली परवानगी होय. बँकांचे जाळे पसरले जाईल, स्पर्धा वाढेल खेडोपाड्यांत बँकांच्या सेवा उपलब्ध होतील पण त्याचवेळी बँकांचे प्रॉफिट मार्जिन कमी होईल आणी जागतिक मंदीमुळे उद्योग्धन्द्याची पीछेहाट झाल्यामुळे बुडीत कर्जाचे प्रमाण वाढेल असा अंदाज आहे.
IDFC बँकेची रेकॉर्ड डेट ५ ऑक्टोबर आहे परंतु IDFC मधून IDFC बँक बाहेर निघाल्यावर त्या बँकेच्या शेअर्सची किंमत काय असेल, लिस्टिंग किती किमतीला होईल याचा अंदाज बांधून लोकांनी IDFCचे शेअर्स विकून टाकले असे जाणवले.त्यामुळे Rs १४० चा शेअर Rs. ६० झाला.IDFC बँकेचे लिस्टिंग नोव्हेबरमध्ये होईल. तेव्हढे दिवस भांडवल अडकून पडेल म्हणून त्यावेळचे त्या वेळेला बघू असा विचार करून लोकांनी शेअर्स सोडून दिले. कारण IDFC बँकेचे बस्तान बसून बँक नावारूपाला येण्यास नक्कीच दोन वर्षाचा कालावधी जाईल. IDFC ही होल्डिंग कंपनी राहील. परंतु एक प्रवाह असाही सांगणारा आहे की IDFC infrastructure प्रोजेक्टसाठी दीर्घ मुदतीची कर्ज देत असूनसुद्धा कर्जवसुलीचे प्रमाण चांगले आहे. NPA (NON PERFORMING ASSET) चे प्रमाण कमी आहे. IPO मध्ये Rs ३४ ला IDFCने शेअर दिले होते बऱ्याच वेळेला मुख्य व्यवसाय आणी दुय्यम व्यवसाय वेगवेगळे केल्यामुळे कंपन्या प्रगतीपथावर येतात हा अनुभव आहे. त्यामुळे गणितांत जरी एक अधिक एक =दोन होत असले तरी हा हिशोब व्यवहारांत आढळत नाही. दोन्ही कंपन्या एकमेकांना पूरक ठरत असल्याने एक अधिक एक =३ ही होऊ शकते. त्यामुळे IDFC तून IDFC BANK बाहेर पडल्यानंतर शेअरहोल्डर्सचा फायदा होईल असे वर्तवले जाते.
सध्या जागतिक दरानुसार GASच्या किंमती ठरतात. हे GAS चे दर कमी झाले याचा फटका ONGC, RELIANCE, GAIL या कम्पन्यांना बसला. पण उलटपक्षी GAS बेस्ड पॉवरप्लांट्स आणी फरटीलायझर प्लांट्सना स्वस्तांत GAS उपलब्ध झाला. रशियाने सिरीयावर जबरदस्त बॉम्बिंग केल्यामुळे सिरीयातून होणारा क्रूडचा पुरवठा कमी होईल असे वाटून क्रूड US$५० च्या वर पोहोचले. जागतिक पातळीवर कोळशाच्या किंमती कमी होत असल्यामुळे कोल इंडियाचा शेअर पडत आहे.म्हणजेच या वर्षी निफ्टीमधले टाटा मोटर्स, टाटा स्टील, भेल, कोल इंडिया, RELIANCE, GAIL, ONGC या सर्व शेअर्सचे भाव काहीनाकाही कारणाने कमी होत आहेत.
ऑटोसेल्सचे आकडे आले. अशोक लेलंड आणी EICHER मोटर्स यांच्या विक्रींत चांगली वाढ झाली. तर महिंद्राची निर्यात वाढली आणी मारुतीची निर्यात कमी झाली.
१०० कंपन्यांचे अडवान्स कराचे आकडे आणी एकूण अप्रत्यक्ष कराच्या संकलनांत झालेली वाढ ह्या गोष्टी अर्थव्यवस्था सुधारत आहे याकडे संकेत करतात.उत्पादनाचे आकडेही वाढले. पण ही प्रगती सामान्य लोकांपर्यंत कधी पोहोचणार ते कळत नाही.
ऑक्टोबर महिना तसा धोक्याचाच, जेव्हा जेव्हा मार्केट जबरदस्त कोसळले तेव्हा तेव्हा ते ऑक्टोबर महिन्यांत कोसळले असे इतिहास सांगतो. याच महिन्यांत कंपन्यांचे दुसऱ्या तिमाहीचे निकालही जाहीर होतात. १२ तारखेपासून IT कंपन्यांचे रिझल्ट्स येण्यास सुरुवात होईल मार्केट नेहेमी काहीतरी शेंडा पकडत असते. या वेळी मार्केटचे लक्ष बिहारच्या निवडणुकांकडे आहे. निवडणुकीचा निकाल जरी नोव्हेंबरमध्ये येणार असला तरी मतदानाच्या आकडेवारीवरून आणी एक्झीट पोलवरून काही अंदाज बांधता येतील.मतदानाचे प्रमाण वाढले तर ट्रेंड बदलण्याची शक्यता असते.
आपल्या आयुष्यांत जशी साडेसाती येते तशीच कंपनीच्या आयुष्यांतही येते असे म्हणावे लागते. साडेसातीतून माणूस कसा तावून सुलाखून बाहेर पडतो आणी आपली प्रगती साध्य करू शकतो यावरच त्या व्यक्तीची गुणवत्ता ठरते. त्याचप्रमाणे कंपन्यासुद्धा संकटांत स्वतःला कशा पद्धतीने सावरतात आपली धोरणे कशी बदलतात आणी पुन्हा प्रगतीपथावर येण्यास किती काळ लागतो हे पहावे लागते. काही काही कंपन्या या अनुभवातून शहाण्या होतात तर काही रसातळाला जातात.
तुम्ही म्हणाल हे प्रवचन पुरे करा आणी आम्ही काय करावे ते सांगा. शेअर विकत घेऊ की नको किती भावाला कधी घेऊ आणी किती भावाला विकून किती पैशे मिळतील हे सांगा. पण गुंतवणूक म्हणजे एखादा खाण्याचा पदार्थ विकत घेणे , त्याचे बिल देणे आणी खाउन झाल्यावर कागद फेकून देणे असे नव्हे. तुम्हाला शेअरमार्केटमध्ये टिकून राहायचे असेल गुंतवणुकीतून जास्तीतजास्त फायदा मिळावा असे वाटत असेल किंवा शेअरमार्केटचा करीअर म्हणून विचार करीत असाल तर या सर्व घटनांचे निरीक्षण केले पाहिजे. कोणत्याही अनिष्ट बातमीमुळे शेअरचा भाव कमी झाल्यास घाईघाईने स्वस्तांत मिळतोय म्ह्णून खरेदी करण्यापेक्षा बातमीची शहानिशा करून विचारपूर्वक खरेदी केली पाहिजे. योग्य वेळी योग्य भावांत खरेदी व विक्री हेच फायद्याचे गणित होय.
 
 

One thought on “आठवड्याचे समालोचन – २८ सप्टेंबर ते १ ऑक्टोबर – शिंक्याच तुटलं आणी बोक्याला फावलं

  1. Pingback: आठवड्याचे समालोचन – वन टू का फोर – ५ ऑक्टोबर ते ९ ऑक्टोबर २०१५ | Stock Market आणि मी

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.