आठवड्याचे समालोचन – १९ ऑक्टोबर ते २३ ऑक्टोबर – निकालांचे प्रतिबिंब शेअरमार्केटच्या आरश्यांत

आधीच्या आठवड्याचं समालोचन वाचण्यासाठी इथे क्लिक करा 
results
ऑक्टोबर महिना सुरु झाला तसे कंपन्यांचे दुसऱ्या तिमाहीचे निकाल येण्यास सुरुवात झाली. आपले शाळा कॉलेजचे रिझल्ट्स असतात तसाच हा प्रकार. शाळा कॉलेजच्या बाबतीतसुद्धा तिमाही, सहामाही नऊमाही आणी वार्षिक अशा परीक्षा होतात आणी त्यांचे निकाल जाहीर होतात. छोट्या छोट्या निकालांकडे त्या मुलांचे, पालकांचे लक्ष असते. परंतु इतर लोक एवढे लक्ष देत नाहीत.वार्षिक परीक्षांचे निकाल महत्वाचे कारण पुढील वर्षी ते मुल पुढच्या इयत्तेत जायचे असते. १० वी व १२ वी च्या परीक्षांच्या निकालांकडे मात्र सर्वांचेच लक्ष असते. या निकालामुळे आयुष्याची दिशा ठरते. असा लोकांचा समज आहे. खरंच असं असतं कां? परावलंबी जिणे आणी पुस्तकी विद्या व्यर्थ आहे. असेच अनेक वेळेला जाणवते.
कंपन्यांना कायद्याप्रमाणे प्रत्येक ३ महिन्यांनी कंपनीची प्रगती किंवा अधोगती जाहीर करावी लागते. काही कंपन्या तिमाही निकालांबरोबर अंतरिम लाभांश जाहीर करतात. त्याचबरोबर काही कंपन्यांना काही तिमाही लाभदायी असतात. स्कूटर, कार,फ्रीज अशा कंपन्यांची विक्री सणावारांच्या सिझनमध्ये वाढते. परंतु आता तुम्ही लक्षांत घेतले पाहिजे की यावर्षी अधिक महिना होता. त्यामुळे सणवार बरोबर एक महिना पुढे गेले त्यामुळे सगळेच टाईम टेबल बदलले. हाच फरक असतो पुस्तकी ज्ञानात आणी प्रत्यक्ष व्यवहारांत! हा अधिक महिना विचारांत घेतला नाही तर सर्वच आकडेमोड चुकेल. सर्वच FMCG (FAST MOVING CONSUMER GOODS) कंपन्यांच्या विक्रीवर असा परिणाम होत माही. ज्या कंपन्या रोज वापरांत येणाऱ्या वस्तू विकतात किंवा त्यांचे उत्पादन करतात अशा कंपन्यांच्या विक्रीवर फारसा परिणाम होत नाही.
यावर्षी सर्वच देशांची अर्थव्यवस्था या ना त्या कारणांनी ढवळून निघाली आहे. उलथापालथ सर्वत्र झालेली दिसते त्यामुळे शेअरमार्केट त्याला अपवाद असू शकत नाही. कमोडीटी मार्केट पडत आहे. त्याचेही प्रतिबिंब निकालाच्या आरश्यांत दिसत असते.
काही काही वेळा आपल्याला असे वाटते की अमुक एक गोष्ट महाग झाली किंवा स्वस्त झाली म्हणून अमुक कंपनीवर त्याचा अनुकूल किंवा प्रतिकूल परिणाम होईल. पण असे घडत नाही. कारण कंपन्या ३ वर्षांसाठी, ५ वर्षांसाठी कच्च्या मालाच्या पुरवठ्यासाठी करार करतात. कारण कच्च्या मालाचा नियमित पुरवठा होणे गरजेचे असते. त्यामुळे त्यांना मोजावी लागणारी किमत व बाजारभाव यांत फरक असतो. अगदी सोप्या शब्दांत सांगायचे झाल्यास कांदा महागला आहे म्हणून घराचे बजेट कोलमडेल असे नाही. जर कांद्याची किंमत वाढत आहे असे पाहताच तुम्ही ३-४ महिने पुरेल एवढे कांदे खरेदी केले तर बजेटवर परिणाम दिसणार नाही.
हवामानाचाही या सगळ्यावर परिणाम असतो. यावर्षी दुष्काळ आहे. अलनिनो नामक वादळ येईल अशी भीती आहे. थायलंडमध्ये तांदुळाचे उत्पादन कमी आहे. जगातील पातळीवर बासमती तांदळाला मागणी आहे. त्यामुळे तांदळाची निर्यात वाढेल आणी अधिक फायदेशीर होईल असा अंदाज असल्यामुळे KRBL, LT FOODS या कंपन्यांचे भाव वाढत आहेत.
याबरोबरच सरकारी निर्णयांचे परिणामही होत असतात. बोनसच्या कमाल मर्यादेत वाढ, 7TH पे कमिशनचा येऊ घातलेला रिपोर्ट यामुळे नोकरी करणाऱ्या लोकांच्या हातात जास्त पैसा आल्यामुळे मागणी वाढण्याची शक्यता आहे.तसेच काही वेळा सरकार त्यांच्या काही करातून काही उद्योगांना सूट देते, उदा: विंडएनर्जी उद्योगाच्या काही उत्पादनांवर एक्साइज ड्युटी माफ केली गेली. काही वेळेला सरकार स्थानिक उद्योगांना सरंक्षण देण्यासाठी आयातीवर कर बसवते किंवा निर्यातीवर सबसिडी देते. उदा: सरकारने घोषणा केली की अल्युमिनियम प्रोडक्ट्स आणी अल्युमिनीयम SCRAP यावर २२-२५ % आयात ड्युटी लावण्याच्या विचारांत आहे. सरकार कोणत्या उद्योगांत परदेशी गुंतवणूकिला मंजुरी देईल यावरही त्या उद्योगांत असणार्या कंपन्यांच्या शेअर्सचे भाव अवलंबून असतात. जंग जवळ आल्यामुळे आंतरराष्टीय क्षेत्रांत घडणार्या घटनांचाही परिणाम शेअर्सच्या किमतीवर होतो. उदा: आंतरराष्ट्रीय मार्केटमध्ये साखरेची वाढणारी किंमत आणी क्रूडची सतत घटत जाणारी किंमत. या सगळ्याचा परिणाम शेअरच्या किमतीवर तात्पुरता दिसतो. काही वेळेला मात्र खर्या अर्थाने कंपनीची परिस्थिती सुधारल्यामुळे हा परिणाम कंपनीच्या निकालांमध्ये दिसून येतो.
नेहेमी ITचे रिझल्ट्स चांगले येत यावर्षी ते तितकेसे चांगले आले नाहीत. IT कंपन्यांनी दिलेल्या निराशाजनक गायडंसमुळे त्यांचे दुसऱ्या अर्धवर्षातील रिझल्ट्स फारसे चांगले येणार नाहीत असा अंदाज आहे. त्यातही इन्फोसिस, MINDTREE. EMPHASIS BFL या कंपन्यांचे रिझल्ट्स चांगले आले. या वर्षी छोट्या आणी मध्यम IT कंपन्यांचे results त्यामानाने बरे आले.  MASTEK या कंपनीचा रिझल्ट खराब आला. म्हणजेच पूर्वीच्या बुल रनचे नेतृत्व IT कंपन्यांकडे होते तशी स्थिती आता दिसत नाही. या सर्वाला कारण USA ची कमकुवत अर्थव्यवस्था आहे. HCLTECH या IT क्षेत्रातील कंपनीने प्रॉफीट वार्निंग दिली होती. त्यामुळे या कंपनीचा रिझल्ट MUTED आला. याचे फारसे आश्चर्य गुंतवणूकदारांना वाटले नाही. फायदा –Rs१७२६ कोटी, EBITD Rs २०७६ कोटी. सर्वांना मार्जिन कमी होईल असे वाटले होते पण मार्जिन तेव्हढ्या प्रमाणांत कमी झाले नाही. मार्जिन २०.५६% ते ATTRITION रेट १६.३ % होता.विप्रोचा रिझल्ट चांगला आला पण विप्रोने गायडंस निराशाजनक दिला. याउलट रिलायंस इंडस्ट्रीजचा निकाल चांगला येत नाही पण या वेळेला चांगला आला आहे.हळू हळू रिलायंसची पूर्वीची शान परत येईल कां याकडे गुंतवणूकदारांचे लक्ष आहे. HDFC बँकेने मात्र आपली चांगले रिझल्ट्स देण्याची परंपरा ठेवली आहे. त्यामुळे HDFC बँक आणी HDFC हे शेअर्स पोर्टफोलिओला स्थैर्य देतात. वाढणाऱ्या NPAच्या प्रमाणामुळे बँकांचे रिझल्ट्स खराब येणार हे सर्वांनी गृहीतच धरले आहे. त्याप्रमाणे फेडरल बँकेचा शेअर बँकेच्या NPA मध्ये वाढ झाल्यामुळे ७.५% पडला. ऑटो सेक्टरच्या बाबतीतही निकालांचा ट्रेंड बदलला. यावेळी हिरो मोटो व बजाज ऑटो यांचे रिझल्ट्स बरेच दिवसांनी चांगले लागले. बऱ्याच दिवसांनी इंडिअन रुपी US $ च्या तुलनेत सुधारला.ECB (EUROPEAN CENTRAL बँक) ने आपल्या रेट्स मध्ये काहीच फरक केला नाही.
इंडिगो या प्रवासी वाहतूक करणाऱ्या विमान कंपनीचा IPO २७ ते २९ ऑक्टोबर दरम्यान येईल. प्राईस band Rs ७०० ते Rs ७६५ असा असेल. कॅफे कॉफी डे चा IPO १.८९ पट सबस्क्राईब झाला. शेअरची इशू प्राईस Rs ३२८ ठरवली
सरकारने विंड एनर्जी उद्योगाशी संबधीत काही उत्पादनांवरील उदा: TOWER रोटर ब्लेडस एक्साईज ड्युटी काढून टाकली.. सरकारच्या या निर्णयाचा फायदा INOX विंड, UJAAS एनर्जी, ALSTOM T & D या कंपन्यांना होईल.
क्रूडच्या किंमती सतत कमी होत असल्यामुळे आणी क्रूड हा त्यांचा पक्का माल असल्यामुळे CAIRN(इंडिया) या कंपनीचा दुसऱ्या तिमाहीचा रिझल्ट खराब आला. हिंदुस्थान झिंक या कंपनीचा रिझल्ट चांगला आला आणी त्यांनी प्रती शेअर Rs. ३.९० अंतरिम लाभांश (स्पेशल अंतरिम लाभांश मिळून) जाहीर केला.
नेस्लेच्या बाबतीत एक उत्साहवर्धक बातमी आली. तीन प्रतिष्ठीत labमध्ये केलेल्या चाचण्यांमध्ये आक्षेपार्ह घटक कमी किंवा योग्य त्या प्रमाणांत आढळून आले. पर्यायाने गुजरात राज्यसरकारने ‘maggi’ वरील बंदी उठवली. त्यामुळे आता नेस्ले पुन्हा maggi लौंच करण्याची जोरदार तयारी करीत आहे.
बजरंगी भाईजान, बाहुबली त्या सारखे चित्रपट हिट झाल्यामुळे PVR EROS INOX या मेडिया क्षेत्रातील कंपन्यांचा रिझल्ट चांगला येईल असा अंदाज आहे. पोलंडची कंपनी सेलोन बरोबर करार केला. त्यामुळे ग्लेनमार्क फार्मा या कंपनीला १५ युरोपीयन देशांत मार्केटिंगचे हक्क मिळाले.
M & M ही दिग्गज कंपनी डाळींच्या उद्योगांत उतरत आहे. त्यांनी मुंबईत या व्यवसायाची मुहूर्तमेढ रोवली.. जिंदाल पोली आणी जिंदाल फोटो या कंपन्यांच्या विलीनीकरणाला हायकोर्टाने मान्यता दिली. रिलायंस कॅपिटल ही कंपनी गोल्डमन SACHS या कंपनीचा भारतातील AMC बिझीनेस Rs २४३ कोटींना खरेदी करणार आहे. ATC या आंतरराष्ट्रीय कंपनीने VIOM नेटवर्क्स या कंपनीतील ५१ % हिस्सा खरीदण्यासाठी करार केला. SREI इन्फ्रा, टाटा हे आपला स्टेक विकणार आहेत STRIDES ARCOLAB ही कंपनी JONHSON and JOHNSON चे सात ब्रांड खरेदी करीत आहे.
मारुती ही सुझुकी या जपानी कंपनीला रॉयलटीचे पेमेंट करते. सुझुकी ही जपानी कंपनी रिसर्च आणी डेव्हलपमेंटवर खर्च करते. रिसर्च आणी डेव्हलपमेंटवरील खर्च आणी पेड केली जाणारी रॉयलटी यांचा काहीतरी संबंध असणे जरुरीचे आहे, सरकारने या बाबतीत कायदा करावा असे तज्ञाचे मंत आहे.आणी गुंतवणूकदारांनी या वर विचार करून मतदान करावे. मारुती स्वतः रिसर्च आणी डेव्हलपमेंटसाठी रोहतक येथे कारखाना चालू करीत आहे.
कंपन्यांचे निकाल गुंतवणूकदारांना ज्या पद्धतीने समजले त्या पद्धतीने लोकांनी काही शेअर्सला धडा शिकवला तर काही शेअर्सची पाठ थोपटून शाबासकी दिली. काही शेअर्सच्या बाबतीत मात्र काही दिवस वाट पाहण्याचे धोरण स्वीकारले. आता अजूनही काही कंपन्यांचे निकाल येणे शिल्लक आहे, त्यामुले आपला आरसा साफ करून निकालाचे प्रतिबिंब पाहून पुढील निर्णय घेण्यासाठी सज्ज होऊ या.
 

2 thoughts on “आठवड्याचे समालोचन – १९ ऑक्टोबर ते २३ ऑक्टोबर – निकालांचे प्रतिबिंब शेअरमार्केटच्या आरश्यांत

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.