आधीच्या आठवड्याचं समालोचन वाचण्यासाठी इथे क्लिक करा

मार्केट सातत्याने पडत असल्यामुळे सगळ्या गुंतवणूकदारांचा मूड खराब झाला आहे. मार्केट पडते आहे म्हणून शेअर्स विकावे तर नेमकं त्या दिवशीच त्या शेअरचा भाव वाढून मनाला चुटपूट लागते.  आणी एखादा शेअर खरेदी केला तर त्या शेअरचा भाव पडतो त्यामुळे आपल्याला अजून स्वस्तांत शेअर खरेदी करता आला असता चूटपूट  लागून राहते. एकंदरीतच निर्णय घेण्यास कठीण असेच मार्केटचे वर्णन करावे लागेल.
 
 
आंतरराष्ट्रीय घडामोडी

• चीनच्या सेन्ट्रल बँकेने अर्थव्यवस्थेमध्ये १३००० कोटी युवान घातले
• क्रूडचा भाव सतत खाली येत आहे

सरकारी announcements

• NATIONAL SPOT SCAM मध्ये DEFAULTER असतील त्यांची जमीन सरकार लिलाव करून विकणार आहे.
• सरकारने ITDC च्या मालकीची १२ हॉटेल्स विकायला काढली आहेत. अजूनही भविष्यांत १८ हॉटेल्स विकायला काढणार आहे. त्याचप्रमाणे दीर्घ मुदतीसाठी लीजवर देण्याचा विचार करीत आहे.त्यामुळे ITDC चा शेअरची किंमत वाढली.
• 25 फेबृआरी २०१६ रोजी सरकारने रेल्वे अंदाजपत्रक सादर केले. या अंदाजपत्रकांत कंपन्यांच्या फायद्याच्या दृष्टीकोनातून फारसे काही आढळले नाही. सामाजिक गरजांना प्राधान्य दिलेले होते. त्यामुळे रेल्वे संबंधीत कंपन्यांच्या शेअर्सचे भाव झपाट्याने कोसळले.
• २६ फेबृआरी २०१६ रोजी इकोनोमिक सर्व्हे प्रसिद्ध झाला. या मध्ये बँकांना भांडवल पुरवले जाईल आणी या भांडवलाच्या रकमेत वाढ केली जाईल GDP ७% ते ७.७५% मध्ये राहील आणी फिस्कल तुट ३.५% असेल असे सांगितले गेले. CAD ( CURRENT ACCOUNT DEFICIT) १% ते १.५% आणी महागाईचा दर ४.५% राहील सांगितले गेले त्यामुळे गुंतवणूकदारांना थोडेसे हायसे वाटले.
• NPA विकत घेणाऱ्या ARC (ASSET RECONSTRUCTION COMPANY) मध्ये FII ना १००% गुंतवणूक ऑटोमटिक रूटने करण्यासाठी परवानगी दिली जाईल असा अंदाज आहे.

सेबी, रिझर्व बँकच्या गोष्टी

•  सेबीने NSE (NATIONAL STOCK EXCHANGE) चा निर्देशांक निफ्टीमध्ये असणाऱ्या घटक शेअर्स मध्ये बदल केला. मार्केट कॅपमध्ये बदल झाल्यामुळे निफ्टीमधून काही शेअर्स काढून दुसरे शेअर्स घातले जातात. टाटा मोटर्स आणी टाटा मोटर्स DVR हे जरी दोन शेअर्स असले तरी एकाच कंपनीचे असल्यामुळे निफ्टीत ५० कंपन्या असतील पण ५१ शेअर्स असतील. निफ्टीमधील घटक शेअर्स सतत बदलले जात असल्याने निफ्टी 2002 आणी निफ्टी २०१६ मध्ये तुलना करता येणे कठीण होते. ज्या कंपन्या प्रगतीपथावर आहेत त्यांचे शेअर्स निफ्टीमध्ये घातले जातात आणी ज्या कंपन्यांची प्रगती दिसत नाही त्यांना निफ्टीमधून काढले जाते. या प्रकारे निफ्टीचा EPS कायम राखण्याचा प्रयत्न केला जातो.
• १ एप्रिल २०१६ पासून PNB, वेदान्ता आणी cairn (इंडिया) या कंपन्या निफ्टीच्या घटक असणार नाहीत. या कंपन्यांऐवजी ऑरोबिन्दो फार्मा, भारती इन्फ्राटेल, आयशर मोटर्स आणी टाटा मोटर्स DVR हे शेअर्स सामील होतील.
• टाटा मोटर्स DVR हा निफ्टीमध्ये सामील होणारा पहिला DVR (DIFFERENTIAL VOTING RIGHTS) शेअर आहे.
• टाटा एलेक्सी, पी सी जुवेलर्स, इंडो कौंट, के पी आय टी टेक्नोलॉजी, GRANUELS, कमिन्स या कंपनीचे शेअर्स F & O मध्ये सामील केले गेले.

खाजगी कंपन्यांच्या घडामोडी

• हरयाणामध्ये जाट लोकांचे आरक्षणासाठी आंदोलन सुरु आहे.यामुळे हायवे जाम झाले मालाचा, पुरवठा होऊ शकला नाही. याचा परिणाम मारुती आणी हिरो मोटो या कंपन्यांच्या कामकाजावर झाला. अर्थातच याचा परिणाम शेअर्सच्या किंमतीवरही झाला.
• दिवी’ज lab या कंपनीच्या प्लांटवर USFDA ने तपासणी केली.
• ‘MAX INDIA’ ४९% FDI गुंतवणुकीच्या परवानगीत बदल करून ही परवानगी ऑटोमटिक रूट ने द्यावी असा विचार चालू आहे. याचा अर्थ काय तर FDI नी गुंतवणूक करण्यासाठी सरकारी परवानगीची गरज असणार नाही.
• लार्सेन & टुब्रो ही कंपनी आपले नॉनकोअर बिझीनेस विकणार आहे. गेल्या वेळी चंदिगढ मधील हॉटेल विकले होते.
  २३ फेबृआरीला मंगळवारी सरकार त्यांचा NTPC मधील ५% स्टेक OFS (OFFER FOR SALE) द्वारे विकला NTPC च्या OFS ची फ्लोअर प्राईस Rs १२२ होती. OFSला चांगला प्रतिसाद मिळाला.
• रिलायन्स जियो २०१८ पासून PAN INDIA सेवा देणार आहे.
• DIAGEO या कंपनीने युनायटेड स्पिरीटच्या चेअरमनला म्हणजेच विजय मल्ल्या यांना US$ ७५ MILLION देण्याचे मान्य केले. विजय मल्ल्या यांनी युनायटेड स्पिरीट या कंपनीचे चेअरमनपद सोडले.या बातमीमुळे शेअरची किंमत मात्र वाढली.
• JP ग्रूप आणी ULTRATECH यांच्यातील ५३०० कोटी रुपयाचे डील रद्द झाले.
• नेईवेली लिग्नाईट या कंपनीला दोन कोळशाच्या खाणी ALLOT केल्या गेल्या.
• NMDC या कंपनीचा शेअर २४ फेबृआरी रोजी EX लाभांश झाला. या कंपनीने अंतरिम लाभांश Rs ९.५० प्रती शेअर जाहीर केला होता.
• REC या सार्वजनिक क्षेत्रातील सरकारी कंपनीने Rs १२ प्रती शेअर लाभांश जाहीर केला.
• रेल्वेशी संबंधीत असलेल्या कंपन्याचे शेअर्स रेल्वे अंदाजपत्रकाकडून फारशा अपेक्षा गुंतवणूकदार ठेवत नसल्यामुळे पडले.

या आठवड्यांत येणारे IPO :-

• या आठवड्यांत क्विक हिल या कंपनीच्या IPO चे शेअर लिस्टिंग झाले. हे लिस्टिंग चांगले झाले नाही. Rs ३२१ इशू प्राईस असलेल्या या शेअरची किंमत २६ फेबृआरी २०१६ राजी Rs २००च्या खाली गेली.

या आठवड्यात मार्केटनी आपल्याला काय शिकवलं
मार्केट्ची रचना सतत बदलते आहे.  ९० मार्क मिळालेलयाला ८९ मिळाले की अधोगती समजली जाते. परंतु ३५ मार्क मिळालेल्याला ३६ गुण मिळाल्यास प्रगती समजतात. तसेच काहीसे क्रूडच्या बाबतीत आहे. पूर्वी क्रूडचा भाव वाढला की मार्केट पडत असते आणी क्रूडचा भाव कमी झाला तर मार्केटमध्ये तेजी येत असे. पण सध्या बरोबर उलट परिस्थिती आहे. गेले वर्ष दीड वर्ष क्रूड सातत्याने पडत आहे ही गोष्ट भारतीय अर्थव्यवस्थेच्या दृष्टीने चांगली असली तरी जागतिक अर्थव्यवस्था मात्र कोलमडत आहे. त्याचा अप्रत्यक्षपणे भारताच्या अर्थव्यवस्थेवर वाईट परिणाम होत आहे. त्यामुळे आता क्रूडचा भाव वाढला की मार्केट वाढते आणी क्रडचा भाव कमी झाला की मार्केट पडते. याचाच अर्थ कोणतीही गोष्ट प्रमाणांत हवी. अती तिथे मातीच होते.
कोणत्याही वस्तूचा भाव खरेदी करणाऱ्याच्या आणी विक्री करणार्याच्या दृष्टीने योग्य हवा असे नसल्यास दर्शनी फयदा होत असला तरी खोलवर विचार केल्यास दीर्घ काळासाठी ते अपायकारक ठरते.त्यामुळेच घडणार्या घटनांचे निरीक्षण करून मगच निष्कर्ष काढणे योग्य ठरते. मार्केटच सर्वांत बुद्धीमान आहे हे पदोपदी पटते.
या आठवड्यात निफ्टी ७०२९ वर आणी सेन्सेक्स २३१२४ वर बंद झाले

आधीच्या आठवड्याचं समालोचन वाचण्यासाठी इथे क्लिक करा
या आठवड्यांत भल्या भल्यांना मार्केटचा कल समजत नव्हता. मार्केट ओवरसोल्ड वाटावे असेच होते. पण यापेक्षा जास्त पडणार कां ? याचेही उत्तर कोणाकडेही नव्हते. तेजी आली तर ती टिकणार कां ? याबद्दलची शंका… त्यामुळे मार्केटमध्ये अनिश्चित वातावरण होते. प्रत्येकजण या ना त्या कारणाने संभ्रमांत होता. त्यामुळे ३०० पाईंट मार्केट पडले की सुधारत होते आणी सुधारले की पुन्हा मार्केट पडत होते.
सोमवारी सर्वांना आश्चर्य वाटले असेल, की ज्या बँकाचे तिमाही निकाल सर्वांत खराब आहेत, त्या बँकांचे शेअर्स १०% ते १५% वाढले. याचे मुख्य कारण short कवरिंग (ज्या लोकांना असे वाटले की बँकांचे निकाल खराब आले आशादायी वातावरण नाही त्यामुळे त्यांनी short केले.म्हणजे मी पुर्वी सांगितल्याप्रमाणे शेअर्स जवळ नसताना आधी विकून टाकले. नंतर शेअर्सची किंमत कमी झाली की ते विकत घ्यायचे.) पण जशी जशी शेअर्सची किंमत वाढू लागली तसा तसा त्यांचा तोटा होऊ लागताच त्यांनी शेअर्स खरेदी करायला सुरुवात केली. हे सर्व पूर्वी मला सांगणारे कुणीच नव्हते त्यामुळे असे कसे घडले हे मला समजत नव्हते. मी मलाच बुद्धी नाही म्हणून स्वतःला कोसत असे.
सोमवारी हेच जाणवले की ५०० पाईंटच्यावर मार्केट वाढले तरी चांगल्या गुणवत्तेचे शेअर्स वाढत आहेत असे वाटले नाही. याउलट जे शेअर्स खूप पडले होते ते वाढत होते.
आंतरराष्ट्रीय घडामोडी

•  क्रूड उत्पादन करणाऱ्या देशांची स्थिती खूपच खराब झाली आहे. ओपेक आणी गैर ओपेक देश एकत्र बसून क्रूडचे उत्पादन कमी करण्याच्या योजनेवर विचार करतील असे समजते पण बुधवारी इराक आणी व्हेनेझुएला यांच्यांत बैठक झाली. त्यानंतर इराण, इराक क्रुद्चे उत्पादन वाढवतील असे जाहीर झाले पण सगळीकडून क्रूडचे उत्पादन कमी करावे म्हणून प्रत्यक्ष किंवा अप्रत्यक्ष दबाव आणला जात आहे.
• युरोपिअन युनियनने चीन आणी रशिया कडून आयात होणाऱ्या स्टीलवरील anti dumping ड्युटी रद्द केली.
  चीनच्या मार्केटमुळे धातू क्षेत्रातील शेअर्स वाढले बँक ऑफ जपान आणी PBOC ( पब्लिक बँक ऑफ चायना) काही स्टीम्युलस देतील असे सांगितले जाते

सरकारी announcements

•  सरकारने FTIL ( फायनानसियल टेक्नोलॉजी इंडिया लिमिटेड) आणी NSEL यांच्या मर्जरला मंजुरी दिली.
• मुंबईमध्ये मेक इन इंडिया महोत्सावाचे पंतप्रधान नरेंद्र मोदिनी उद्घाटन केले . या महोत्सवांत ६५ देशांनी भाग घेतला आहे. या महोत्सवांत एकूण Rs २१००० कोटींचे MOU झाले. यांत ओरकॅल, कोकाकोला, रेमंड यांचे MOU झाले.
• सरकारी बँकांत परदेशी गुंतवणुकीची सीमा ४९% पर्यंत वाढवली जाईल. टप्प्याटप्प्याने सरकार आपली हिस्सेदारी कमी करेल आणी तसे अन्दाजपत्रकांत जाहीर करेल असा अंदाज व्यक्त केला जात आहे.
• बँकिंग सेक्टरमधील विविध अडचणींमुळे, कमी झालेल्या बँकांच्या शेअर्सच्या किमतीमुळे आणी बँकिंग क्षेत्रांत आलेल्या मंदीमुळे एल आय सी ला Rs १०३३६ कोटी नुकसान झाले. १४ सरकारी बँकांमध्ये एल आय सी ची १०% गुंतवणूक आहे
• अंदाजपत्रकांत लॉंग टर्म कॅपिटल गेन्स्ची मुदत आताच्या १ वर्षाऐवजी ३ वर्षांची केली जाईल असाही अंदाज व्यक्त केला जात आहे. ही शेअर मार्केटमध्ये गुंतवणूक करणाऱ्या गुंतवणूकदारांसाठी निराशाजनक बातमी आहे.
• सरकारने सेबी चेअरमन U. K सिन्हा यांच्या पदाची मुदत एका वर्षांनी वाढवली.
• २९ फेबृआरीला सदर होणारे वार्षिक अंदाजपत्रक हा आता मार्केटला खाली किंवा वर घेवून जाणारा एक महत्वाचा ट्रिगर आहे.सिमेंट आणी पेट्रोकेमिकल उद्योगांना या अंदाजपत्रकांत काही सवलती जाहीर होतील असा अंदाज आहे. तसेच विंड एनर्जी आणी एकूणच आल्टरनेट उर्जा स्त्रोताना अन्दाजपत्रकांत प्रोत्साहन अपेक्षित आहे.
• अंदाजपत्रक सादर व्हायची तारीख जवळ आली की ज्या क्षेत्रांना अन्दाजपत्रकांत सवलती जाहीर होणार असतील ते शेअर वाढतात, आणी अंदाजपत्रक जाहीर झाल्यानंतरच्या वर्षभरांत कधीही शेअर्सच्या मैदानांत ते शेअर्स आढळत नाहीत त्याच गटांत येणारे रेल्वे आणी खताचे शेअर्स वाढले. अंदाजपत्रक म्हटले की शेती आणी शेतीवर आधारीत उद्योग, नोकऱ्या आणी स्वयंरोजगार वाढतील असे व्यवसाय, कुटिरोद्योग या सगळ्या क्षेत्रांचा विचार होतो. ज्यांना कुणाला ‘झट की पट’ खरेदी विक्री करणे जमत असेल त्यांनीच या शेअर्सच्या भानगडीत पडावं.
• सुप्रीम कोर्टाने गेल्या पांच वर्षातील Rs ५०० कोटी आणी त्यापेक्षा जास्त कर्ज घेतलेल्या आणी कर्जाची परतफेड वेळेवर आणी नियमाप्रमाणे न करणाऱ्या सर्व कर्जदारांची माहिती रिझर्व बँकेकडून मागवली. त्याचप्रमाणे गेल्या पांच वर्षांत write-off केलेल्या कर्जांचीही यादी मागवली. ही माहिती कोर्टाने रिझर्व बँकेला सहा महिन्यांत द्यायला सांगितली आहे.त्यामुळे गुंतवणूकदारांना वाटले की आपलाही कोणी तरी वाली आहे.

अर्थव्यवस्थेच्या गोष्टी

• भारताची निर्यात सातत्याने नवव्या महिन्यांत कमी झाली. त्याचबरोबर आयात कमी झाल्याने CAD (CURRENT ACCOUNT DEFICIT) वर जास्त परिणाम झालेला नाही. WPI  (होलसेल प्राईस निर्सेशांक ) -.०९% कमी झाला.
• निरनिराळ्या क्षेत्रातील कंपन्यांच्या निकालांत बॉटम लाईन ग्रोथ दिसते. कच्च्या मालाच्या किमती कमी झाल्यामुळे आणी मुख्यतः क्रूडच्या किमतीत घट झाल्यामुळे बॉटम लाईन ग्रोथ दिसते. टॉप लाईन ग्रोथ दिसत नाही कारण विविध कारणांमुळे ग्रामीण तसेच अर्धशहरी भागातील मागणी कमी झाली आहे आणी किंमातीवर परिणाम झाला आहे

खाजगी कंपन्यांच्या घडामोडी

• अल्केम lab, लाल पाथ lab HPCL, BPCL यांचे तिमाही निकाल चांगले आले.
• बँक ऑफ बरोडा, IDBI, PNB, आणी इतर राष्ट्रीयीकृत बँकांचे तिमाही निकाल अतिशय निराशाजनक आले. NPA झालेली होणारी वाढ आणी त्याकरता करावी लागणारी तरतूद यामुळे एकदोन अपवाद वगळता सर्व बँकांनी यावेळेला तोटा जाहीर केला. जखमेवर मीठ चोळावे त्याप्रमाणे आमचे मार्च २०१६ अखेरचे निकालही खराब येतील असे जाहीर केले.यांत सरकारी तसेच खाजगी बँकांचाही समावेश आहे.
• बँक ऑफ बरोडा च्या CMD ने असे जाहीर केले की ‘आम्ही मार्चपर्यंतची NPA साठी आवश्यक असणारी सर्व तरतूद याच तिमाहींत केल्यामुळे आमच्या मार्च अखेरपर्यंतच्या निकालावर परिणाम होणार नाही. कॅपिटल ADEQUACY चांगली असल्यामुळे सरकारकडे भाग भांडवल मागण्याची वेळ येणार नाही. आणी तशीच जरूर वाटल्यास नॉनकोअर assets विकून पैशाची तरतूद करू शकू.’ या त्यांच्या स्टेटमेंट मुले बँक ऑफ बरोडाचा शेअर २३% वाढला.
• सिप्ला, डेन नेटवर्क आणी ग्लेनमार्क फार्मा याचे FDI लिमिटसाठी असलेले प्रस्ताव मंजूर झाले.
• पी एन बी ने यु बी होल्डिंग या कंपनीला आणी विजय मल्ल्याना विलफुल defaulter म्हणून जाहीर केले.
• NMDCने Rs ९.५० प्रती शेअर अंतरिम लाभांश जाहीर केला.REC या सरकारी कंपनीने .Rs १२ प्रती शेअर लाभांश जाहीर केला.
• टाटा स्टील ही कंपनी युरोप मधील आपला कारभार विकून कर्ज कमी करण्याचा प्रयत्न करणार आहे.
• बहुदेशिय कंपन्यांची रॉयलटी सातत्याने वाढवत असल्याने आणी भारतातील त्यांच्या कंपन्यांचा फायदा तेव्हढ्या प्रमाणांत वाढत नसल्यामुळे या कंपन्यांच्या प्रॉफीटवर परिणाम होऊ शकतो. रिटेल गुंतावूक्दारांनी या गोष्टींकडे लक्ष देण्याची जरुरी आहे. उदा :- ABB, मारुती, HUL, NESLE, BOSCH.

या आठवड्यांत येणारे IPO–

• उज्जीवन फायनांसियल सर्विसेस ही कंपनी ipo मधून Rs ६०० कोटी उभारणार आहे

या आठवड्यात मार्केटनी आपल्याला काय शिकवलं
ही बेअर मार्केट rally आहे कारण  शेअर्सची किंमत २०% वर  गेल्यानंतर लगेच खरेदीदार येत नाहीत. short कव्हरिंग होते किंवा वातावरण बदलले तर पुन्हा shorting होते. जे शेअर्स ओवरओन्ड आहेत आणी डीफेन्सीव शेअर्स आहेत त्यांचीही विक्री सुरु झाली आहे. मार्केटमध्ये  खूपच volatility वाढली आहे.  मार्केट दर तासाला वेगवेगळे रागरंग दाखवत आहे.
त्यामुळे लहरी राजा जसा प्रजेला नाचवतो आणी प्रजा आंधळेपणाने राजाची लहर स्वीकारते.त्याच पद्धतीने मार्केट लहरी राजाप्रमाणे रोज सातात्याने तेजी आणी मंदीच्या तालावर गुंतवणूकदारांना नाचवते. त्यामुळे विश्लेषक, सगळ्या प्रकारचे गुंतवणूकदार,  गोंधळात वावरतात. कोणालाही घेतलेले निर्णय आणी वर्तवलेले अंदाज बरोबर येतील याची खात्री नसते. या पद्धतीने शेअरमार्केटचा दरबार अधांतरीच आहे असे जाणवते. म्हणून लहरी राजा प्रजा आंधळी अधांतरी दरबार, उद्धवा अजब तुझे सरकार हे वचन मार्केट सार्थ करतंय.

आधीच्या आठवड्याचं समालोचन वाचण्यासाठी इथे क्लिक करा

सध्या शेअरमार्केटमधील वातावरण बदलले आहे. प्रत्येक गुंतवणूकदार हादरला आहे. शेअरमार्केट किती वाढेल किंवा किती पडेल हे कोणी कधीच अचूक सांगू शकत नाही. त्यामुळे शेअर अजून किती ढासळेल याचा प्रत्येकजण विचार करतो. ‘मन चिंती ते वैरी न चिंती’ याला शेअरमार्केट तरी अपवाद कसा असेल ? सध्या खरे पाहता भारताची आर्थिक स्थिती चांगली आहे. पण जग जवळ आलेल्याचा हा दुष्परिणाम म्हणावा लागेल की जगांत काही वाईट घडले की त्याची झळ सगळ्यांना लागतेच.
क्रूडचा खेळ झाला खरा, दुसऱ्याची जिरवायला गेलं की स्वतःचीच जिरते असे झाले. क्रुडच्या भावातील सतत होणाऱ्या घटीचा परिणाम सगळ्यांना कारण नसताना सोसावा लागला. सध्या जगातील शेअरमार्केट पडत आहेत ती याच कारणाने.
क्रिकेटचा सामना असतो मग तो कसोटी सामना असो वनडे सामना असो की ट्वेन्टी ट्वेन्टीचा सामना असो. त्या प्रत्येक सामन्यासाठी सामनावीर, सर्वोत्कृष्ट फलंदाज आणी सर्वोत्कृष्ट गोलंदाज आणी त्या सामन्यांच्या मालिकेतील सर्वोत्कृष्ट खेळाडू निवडला जातो. तसे आज आम्ही मार्केट कोणामुळे पडलें हे शोधतो आहे. प्रत्येक दिवशी नायक शोधण्याऐवजी खलनायक कोण हे शोधतो आहे अशी स्थिति आली आहे.कोणीही उद्यावर विश्वास ठेवायला तयार नाही. त्यामुळे मार्केटमधील ट्रेड क्लोज करण्याकडेच सगळ्यांचा कल आहे. सध्या मार्केट सुधारण्यासाठी अन्दाजपत्रकाशिवाय कोणतेही कारण दृष्टीपथांत नाही.
आंतरराष्ट्रीय घडामोडी

• येमेन आणी सौदी अरेबिया यांच्यांत युद्ध सुरु झाले तर उत्तर कोरिया आणी दक्षिण कोरिया यांच्यांत युध्दसदृश परिस्थिती निर्माण झाली आहे.
• क्रुडमधील पडझड थांबण्याचे नाव घेत नाही. सतत पडणार्या क्रूडच्या किंमतीमुळे ओएनजीसी, ओईल इंडिया आणी केर्न इंडीआ या कंपन्यांच्या कारभारावर गंभीर परिणाम झाले तसेच मध्यपुर्वेतील देशांबरोबर, तसेच रशिया आणी क्रूड ज्यांचे मुख्य उत्पनाचे साधन आहे अशा देशांच्या अर्थव्यवस्थेवर आणी पर्यायाने त्या देशांशी व्यवहार करणाऱ्या कंपन्याच्या कारभारावर परिणाम झाला.
• फेडच्या अध्यक्ष जेनेट येलेन यांनी सांगितले की फेड रेटमधील वाढ करण्याचा विचार थोडा पुढे ढकलला जाऊ शकतो.
• या आठवडाभर चीनचे शेअर मार्केट बंद होते.सोमवारी हे मार्केट उघडेल तेव्हा पुन्हा काय गोंधळ समोर येतो याकडे सर्वांचे लक्ष आहे.

सरकारी announcements

• LED टीवी , चहा PACKAGING मशीन आणी कॉफी मशीनवर आयात कर कमी करू असे आश्वासन दिले.
• सरकारकडे सर्व राष्ट्रीयीकृत बॅंकातील NPA एकत्र करून ते ‘BAD BANK’ या नावाने उघडल्या जाणाऱ्या बँकेत बदली केले जावेत असा प्रस्ताव आला आहे. ’ BAD BANK ‘ स्थापन केल्यामुळे बँकांचे वसुलीच्या  कामाचा व्याप कमी होऊन त्यांना क्रेडीट ग्रोथवर लक्ष केंद्रित करता येईल अशी अशा आहे.BAD बँकेला वसुलीसाठी जास्त परिणामकारक अधिकार दिले जातील.

खाजगी कंपन्यांच्या घडामोडी

• अशोक leyland, कोल इंडिया, NCC, पंजाब and सिंध बँक, हिरो मोटो कॉर्प, या कंपन्यांचे तिमाही निकाल चांगले आले. तर ONCC, भेल, स्टेट बँक ऑफ इंडिया, आंध्र बँक, इंडिअन बँक, कॅनरा बँक याचे निकाल निराशाजनक होते.
• HUL ( हिंदुस्थान युनिलीवर लिमिटेड) आपले नॉनकोअर बिझिनेस विकणार आहे (आटा चावल नमक)
• विप्रो एक अमेरिकन हेल्थ कंपनी विकत घेणार आहे.

या आठवड्यांत येणारे IPO :-

• शुक्रवारी टीम लीज या कंपनीचे शानदार लिस्टिंग झाले.
• या आठवड्यांत बंद झालेला क्विक हील हा IPO ११ वेळा ओवरसबस्क्राइब झाला

या आठवड्यात मार्केटनी आपल्याला काय शिकवलं
या आठवड्यांत निफ्टी ७००० च्या खाली गेला.शुक्रवारी ६८६९ पर्यंत मार्केट पत्त्याच्या बंगल्यासारखे कोसळले. मार्केटमध्ये खूप मोठ्या प्रमाणावर घबराट निर्माण झाली की रिझर्व बँकेच्या गव्हरनर आणी अर्थमंत्रालयातील लोकांना गुंतवणूकदारांना धीर देण्यासाठी यावे लागले. एकटा धावतो म्हणून दुसरा, दुसरा धावतो म्हणून तिसरा मग चालू होते पडापडी, चेंगराचेंगरी आणी मग अपघात मृत्यू यांचे तांडव सुरु होते. अशीच मार्केटची अवस्था आज आहे. आपण थोडे दिवस थांबलो तर तोट्यातून फायद्यांत येऊ एवढा विचार गुंतवणूकदार कां करीत नाहीत. कळत नाही नंतर मी उगीचच विकले असे म्हणत राहतात .याचे कारण म्हणजे अनामिक भीतीचे सावट.!
जेव्हा विक्री चालू होते तेव्हा कोणतेही तांत्रिक विश्लेषण उपयोगी पडत नाही.. ३ लाख कोटी रुपये एका दिवसांत केवळ भीतीपोटी नाहीसे झाले. कंपन्यांमध्ये, बॅंकामध्ये, आज एकाएकी काही फरक पडला कां ? तर नाही पण आभाळ फाटले आता ठिगळ कुठे लावायचे अशा चिंतेत लोक होते.
जगबुडी आल्यासारखी स्वतःची अवस्था गुंतवणूकदारानी करून घेतली आहे. काही समजत नसेल तर मार्केट्चे निरीक्षण करावे. जर पैशाची सोय असेल तर थोड्याफार प्रमाणांत खरेदी करावी. पण घाबरून जाऊन विकू नये. दोरी आहे की साप आहे हा विचार न करताच धावत सुटल्यास हातपाय मोडणारच, मार्केटमधील ही स्थिती कायम राहणार नाही. निफ्टी ६८००च्या आसपास मार्केट स्थिरावेल असे वाटते. परंतु प्राईसवाइज करेक्शन झाले आता किंमती वास्तवास धरून झाल्या पण याच स्तरावर मार्केट काही काळ घालवेल असे वाटते त्याचवेळी टाईमवाइज करेक्शन पुरे होईल. त्यामुळे घाबरून न जाता स्वस्थ राहणे योग्य.
BSE निर्देशांक सेन्सेक्स २२९८६ आणी निफ्टी ६९८० वर बंद झाले.

आधीच्या आठवड्याचं समालोचन वाचण्यासाठी इथे क्लिक करा
 आता मला मार्केट वाढण्याची आणी पडण्याची सवय झाली आहे आधी तसं नव्हत. मार्केट पडलं ही गोष्ट माझ्या आवाजावरून, माझ्या चेहऱ्यावरून लगेच कळत असे. मार्केटचा दुखवटा माझा चेहरा पट्कन सांगत असे. त्यावेळी माझी समजूत काढताना माझे यजमान म्हणत “ फक्त तुला काही शेअर खरेदी करायचे आहेत आणी तेही स्वस्तांत किंवा कमीतकमी भावांत, त्यावेळी मार्केट त्या शेअर्सपुरतेच पडणार आहे कां ? मार्केट म्हटल्यावर तेजी  मंदी आलीच. मार्केट जेव्हा मंदीत असेल तेव्हा तुझ्याजवळ जे शेअर्स आहेत त्यांचा भाव मार्केटमध्ये कमी होईल. त्यामुळे तुझ्या पोर्टफ़ोलिओची किंमत कमी होईल. पण तुला स्वस्तांत खरेदी करता येईल. त्याविरुद्ध जेव्हा तेजी येईल तेव्हा तुझ्या पोर्टफ़ोलिओची किंमत वाढेल पण तुला स्वस्तात खरेदी करायला मिळणार नाही. पण तू असे करू नकोस. दुःख करत बसण्यापेक्षा तेजीच्या वेळेला विकत जा आणी मंदीत खरेदी करत जा. आपणच पावसाप्रमाणे छत्री धरावी. जरा दमादमाने प्रत्येक गोष्ट घ्यावी. घाईघाई करू नकोस.”
आंतरराष्ट्रीय घडामोडी

• USA सरकारने जाहीर केले की ‘ACTIVE PHARMA INGREDIENT’चे उत्पादन अमेरिकेतच केले पाहिजे. या निर्णयाचा परिणाम म्हणून ज्या भारतीय कंपन्या वरील API ची अमेरिकेत निर्यात करतात त्या कंपन्यांचे शेअर्स पडले.
• तसेच करन्सी मार्केटमध्ये US$ कमजोर झाल्यामुळे आणी कमोडीटी मार्केटमध्ये सर्व किंमती US$ मध्ये असल्यामुळे सर्व धातूसंबंधीत कंपन्यांचे शेअर्स वधारले.
• क्रुड संबंधांत रशिया आणी ओपेक देशांमध्ये क्रूड उत्पादनाविषयी काही तोडगा निघेल अशी आशा वाढल्यामुळे क्रुडच्या किंमती वाढल्या. तसेच US$ कमजोर झाल्यामुळेही क्रुडची किंमत वाढली.
• लंडनमधील बाल्टिक निर्देशांक ऑगस्ट २०१५ पासून सतत खाली येत आहे. हा आता ३०३ आहे. या निर्देशांकातील ही घट म्हणजे जगातील बहुतांश शिपिंग कंपन्यांकडे काम नाही असे दाखवते

सरकारी announcements

• सरकारने डिझेल आणी पेट्रोलवरील एक्साईज ड्युटी वाढवली. ATF ( विमानांत वापरले जाणारे इंधन) च्या किंमती १२% ने कमी केल्या. याचा फायदा जेट, इंडिगो, तसेच स्पाईसजेट या विमानवाहतूक करणाऱ्या कंपन्यांना होईल.
• नॉन-पॉवर क्षेत्रासाठी कोळश्याच्या खाणींच्या लिलावाला सरकारने परवानगी दिली.
• २३ फेबृआरी २०१६ पासून संसदेचे अंदाजपत्रक सादर करण्यासाठी अधिवेशन सुरु होईल.हे अधिवेशन दोन सत्रांत होईल. पहिले सत्र २३ फेब्रवारी ते १६ मार्च २०१६ आणी दुसरे सत्र २५ एप्रिल ते १३ मे पर्यंत असेल. २५ फेब्रूवारीला रेल्वे अंदाजपत्रक सदर केले जाईल. २६ फेब्रूवारीला इकोनोमिक सर्वे सादर केला जाईल. २९ फेब्रूआरीला अंदाजपत्रक सादर केले जाईल. २०१६-२०१७ साठीचे अंदाजपत्रक लोकप्रियतेकडे लक्ष न देता सुधारणावादी अंदाजपत्रक असेल असे कळते.

RBI, SEBI आणी इतर रेग्युलेटरी संस्था:-

• रिझर्व बँकेने आपली पॉलिसी २ फेब्रूआरीला जाहीर केली. रिझर्व बँकेने रेपो रेट, रिवर्स रेपो रेट, तसेच सी आर आर आणी एस एल आर यामध्ये कोणताही बदल केला नाही.
• किरकोळ महागाईचा निर्देशांक सतत ५ व्या महिन्यांत वाढल्याबद्दल RBI ने चिंता व्यक्त केली.
• RBIने स्टार्टअप कंपन्यांसाठी गुंतवणुकीचे, आणी केलेली गुंतवणूक परत परदेशांत पाठवण्याचे नॉर्म्स सोपे करू असे सांगितले. भारताची आर्थिक स्थिती स्थिर राहण्यासाठी धीम्या गतीने महागाई कमी होण्याची गरज, माफक CAD (CURRENT ACCOUNT DEFICIT) , आणी फिस्कल शिस्त जरुरीची आहे असे सांगितले.
• RBI ने आर्थिक प्रगतीचे उद्दिष्ट आर्थिक वर्ष २०१७ साठी ७.६% आणी मार्च २०१७ साठी महागाईचे उद्दिष्ट ६% निश्चित केले.
• सरकार आणी RBI नव्या बँकिंग परवान्यासाठी जुलै २०१६ पासून एक महिन्याभर अर्ज स्वीकारतील. यावेळी नवीन बँकांना सुरुवातीपासूनच ७४% परदेशी गुंतवणुकीसाठी मंजुरी देण्याचा विचार सुरु आहे.

खाजगी कंपन्यांच्या घडामोडी

• लुपिन या फार्मा क्षेत्रातील कंपनीला USFDA ने क्लीन चीट दिली
• अमेरिको, पिडीलाईट, सिमेन्स, ग्रासिम, व्ही आय पी इंडस्ट्रीज,बजाज फायनान्स, आयशर मोटर्स,लुपिन यांचे निकाल चांगले आले.
• JUST DIAL या कंपनीचे तिमाही निकाल खूपच खराब आले. यामुळे या शेअरची किंमत लिस्टिंग प्राईसच्या खाली गेली.
• टाटा स्टील या कंपनीचे निकाल असमाधानकारक आले.
• ऑटो विक्रीचे आकडे आले. त्यांत मारुतीची विक्री आणी निर्यात दोन्हीही कमी झाली. आयशर मोटर्स ची विक्री वाढली पण निर्यात कमी झाली. अशोक LEYLAND ची विक्री वाढली.
• बजाज ऑटोने आपली नवी १५० CC मोटारबाईक ‘V’ मार्केटमध्ये आणली तर रॉयल एन्फिल्डने त्यांची ‘हिमालयन, ही मोटारबाईक मार्केटमध्ये आणण्याची घोषणा केली.
• टाटांनी ‘नानो’ ही लहान गाडी इकोनॉमिक मॉडेल या नावावर बाजारांत आणली परंतु तिचे मार्केटिंग आणी जाहिरात नीट न झाल्यामुळे या कार मॉडेलला जास्त यश मिळाले नाही. आता टाटा मोटर्सच्या नव्या मॉडेलचे नाव ‘झिका’ असे ठेवले पण हे एका प्राणघातक व्हायरसचे नाव असल्यामुळे कंपनीने हे नाव बदलण्याचे ठरवले आहे.
• अदानी एन्टरप्राईजेसला ‘कारमायकेल’ या कोळश्याच्या खाणीसाठी आस्ट्रेलियन सरकारकडून पर्यावरण मंजुरी मिळाली.
• इप्का lab या कंपनीला USFDA कडून त्यांच्या रतलाम, इंदोर आणी पिपरिया या उत्पादन युनिट्ससाठी वार्निंग लेटर मिळाले.
• महिंद्रा आणी महिंद्रा इलेक्ट्रिक मोबाईल कारभारांत ७०% पर्यंत स्टेक वाढवणार आहे. इलेक्ट्रिक मोबाईल उद्योगाचे नाव बदलून त्याचे नाव महिंद्रा इलेक्ट्रिक असे ठेवले.
• गोदरेज कन्झुमर्स या कंपनीने केनयातील ‘कैनेन केमिकल’ ही कंपनी विकत घेतली. ह्या कंपनीतील ७५% स्टेक गोदरेज कन्झुमरने विकत घेतला.
• कोलगेट पामोलिव या कंपनीला माउथवाशसाठी USFDAची मंजुरी मिळाली.
• रिलायंस इन्फ्राने त्यांचा सिमेंट उत्पादन करणारे युनिट बिर्ला कॉर्पला Rs ४८०० कोटी रुपयांना विकले.

या आठवड्यांत येणारे IPO :-

• ‘क्विक हिल’ हा IPO ८ फेब्रूवारी २०१६ पासून सुरु होतो आहे. याचा प्राईस band Rs ३११ ते Rs ३२१ आहे.

या आठवड्यात मार्केटनी आपल्याला काय शिकवलं
यावेळी असं ध्यानात येतंय की रिझल्ट चांगले आले तरी त्याचा शेअरच्या किंमतीवर परिणाम दिसत नाही. सध्या आपण हेच ऑस्ट्रेलियन क्रिकेट दौऱ्यांत एकदिवशीय सामन्यांत अनुभवले. आपले खेळाडू चांगले खेळत होते. तरी आपण जिंकत नव्हतो.
मी निरीक्षण केलं तेव्हा मला असं लक्षात आलं की फायदा वाढतो आहे पण विक्री कमी होत आहे त्यामुळे ही सुधारणा टिकावू आहे असे गुंतवणूकदारांना वाटत नसावं. त्याचबरोबर ‘अन्य आय’ म्हणजेच इतर उत्पन्न जास्त झाल्यामुळे रिझल्ट चांगला दिसत असेल तर गुंतवणूकदार तो निकाल चांगला मानत नाही. बजाज ऑटोच्या बाबतीत हेच झाले. मागील तिमाहीतील Rs ९५ कोटी अन्य आय या तिमाहीत Rs २०० कोटी झाली  म्हणून शेअर पडला. आपण नेहेमी काय विचार करतो की अन्य उत्पन्नातून पैसा मिळो शेवटी पैसा तो पैसाच असतो. पण उद्योग धंद्यांत तसे चालत नाही. अन्य उत्पन्न हे धंद्याची प्रगती दर्शवत नसते. पुष्कळ लोक निकालाचे नीट आकलन होण्याच्या आधीच डेट्रेड करण्याची घाई करतात आणी संकटांत सापडतात.