मार्केटमध्ये सध्या नकारात्मक बातम्या जास्त आहेत पण त्याचा परिणाम फारसा दिसत नाही. रुपया US $ १ = Rs ७१ च्या स्तरावर पोहोचला. क्रूड US $ ७७ प्रती बॅरेलवर पोहोचले. गेल्या ५ वर्षांचा आढावा घेतला तर सप्टेंबर महिन्याच्या सिरीजमध्ये मंदी असते. त्यातून या वेळेला अधिक महिना आल्यामुळे सगळे सणवार एक महिना पुढे गेले आहेत. त्यामुळे या निमित्ताने होणाऱ्या खरेदीचा परिणाम ३ ऱ्या तिमाहीत दिसेल. पण तरीही अगदी थोड्या प्रमाणात मार्केटमध्ये मंदी येते , पुन्हा खरेदी होते आणि मार्केट सुधारते. त्यामुळे या वर्षीचे कंपन्यांचे अर्निंग सुधारेल असे गृहीत धरून मार्केट चालले आहे असे वाटते.

USA चे अध्यक्ष डोनाल्ड ट्रम्प यांनी USA WTO (वर्ल्ड ट्रेंड ऑर्गनायझेशन) मधून बाहेर पडेल असे सांगितले.

ASTON मार्टिन या कंपनीचा IPO येत आहे. ही कंपनी ००७ कार उत्पादन करणारी कंपनी आहे. ह्या कंपनीचा IPO लंडन स्टॉक एक्स्चेंजवर येत आहे. या कंपनीला जे VALUATION मिळेल त्यावरून टाटा मोटर्सच्या ‘JAGUAR LANDROVER’ चे VALUATION मार्केट ठरवत आहे. म्हणून टाटा मोटर्सचा शेअर वाढला.

कोकाकोला या कंपनीने UK मधील ‘COSTA COFFEE CHAIN ‘ GBP ३.९ बिलियन मध्ये घेतली. मार्केटच्या अपेक्षेप्रमाणे ५०० ते ९०० मिलियन GBP एवढा जास्त भाव या कंपनीला मिळाला. याचा अप्रत्यक्ष परिणाम ‘कॅफे कॉफी डे’ या शेअरवर झाल्यामुळे हा शेअर तेजीत होता. या पद्धतीने टाटा मोटर्सवर किंवा कॅफे कॉफी डेवर झालेल्या परिणामाला ‘RUB OFF EFFECT’ असे म्हणतात.

मल्टिप्लेक्समध्ये बाहेरील खाद्यपदार्थ तसेच पेये घेऊन जायला परवानगी असेल की नाही यावर ३ सप्टेंबर २०१८ रोजी हायकोर्टाचा निर्णय येईल.. त्यामुळे PVR, आयनॉक्स अशा शेअर्स कडे लक्ष ठेवावे लागेल.

एप्रिल ते जून २०१८ या कालावधी साठी वित्तीय घाटा Rs ४.५ लाख कोटी जाहीर झाला. आणि राजस्व घाटा Rs ४.४ लाख कोटी जाहीर झाला.

JK पेपरच्या ओरिसामधील प्लांटमध्ये आजपासून काम बंद झाले.

विशेष लक्षवेधी

• JB केमिकल्स ने CMP वर १५% प्रीमियम देऊन म्हणजेच Rs ३९० प्रती शेअर या भावाने BUY BACK जाहीर केला. यासाठी Rs १३० कोटी खर्च करून ३३.३३ लाख शेअर्स टेंडर ऑफर रूटने BUY BACK केले जातील.
• रुपयाची किंमत सतत ढासळत असल्याने फार्मा क्षेत्रातील कंपन्या त्यातही विशेषतः MNC फार्मा कंपन्यांचे शेअर्स आज तेजीत होते.
• SAIL या सरकारी कंपनीने सरकारला लाभांश देण्यास आपली असमर्थता व्यक्त केली.
• वोडाफोन आणि आयडिया यांच्या मर्जरला NCLT ने परवानगी दिली. या मर्जरनंतर आयडिया ही कंपनी ‘वोडाफोन आयडिया’ अशी ओळखली जाईल .
• येस बँकेचे CEO राणा कपूर यांना RBI ने पुढील सूचना मिळेपर्यंत बँकेचे कामकाज पाहायला सांगितले. पण मार्केटने मात्र या बातमीला नापसंती दर्शवली त्यामुळे YES बँकेचा शेअर पडला.

वेध उद्याचा

• १ सप्टेंबर २०१८ पासून पोस्ट पेमेंट बँक सुरु होणार.
• निफ्टी सप्टेंबर २०१८ या F & O सिरीजसाठी ११४०० ते ११८०० या मर्यादेत राहील असा अंदाज व्यक्त केला जात आहे.
• पुढील आठवड्याच्या साप्ताहिक एक्स्पायरीसाठी बँक निफ्टी २८००० ते २८५०० या मर्यादेत राहिल.
• केरळमधील पुरामुळे आलेल्या हाहाकारामध्ये बरेच लोक आपल्याकडील जे सोने किंवा सोन्याचे दागिने होते ते घेऊन बाहेर पडले. आता पुनर्वसनासाठी याच सोन्याचा आणि सोन्याच्या दागिन्यांचा त्यांना उपयोग होत आहे. या कटू अनुभवामुळे आणि हिरे आणि तत्सम रत्नाना, एकदा वापरले की किंमत मिळणें कठीण जाते किंवा किंमत खूपच कमी मिळते त्यामुळे लोक आता हिरे आणि रत्नांच्या दागिन्यांऐवजी सोन्याचे दागिने बनवण्यावर भर देत आहेत. त्यामुळे सोन्याची मागणी वाढली आहे. सोन्याचा भाव दिवाळीपर्यंत १० ग्रामला Rs ३३००० पर्यंत जाईल असा अंदाज वर्तवला जात आहे.

BSE निर्देशांक सेन्सेक्स ३८६४५ NSE निर्देशांक निफ्टी ११६८० आणि बँक निफ्टी २८०६१ वर बंद झाले

आज मार्केटमध्ये वायदे बाजाराच्या ऑगस्ट एक्स्पायरीची धामधूम जास्त होती. जेवढे मार्केट पडले तेवढेच शेवटच्या अर्ध्या तासात सावरले. विदेशी बाजारातले संकेत चांगले असूनही रुपयाचे होणारे अवमूल्यन आणि वाढणारी क्रूडची किंमत यामुळेच ट्रेडिंग करताना गोंधळ उडत होता

प्रत्येक सिरीजमध्ये ITC चा शेअर वाढताना दिसतो आहे. ITC चे अनेक व्यवसाय आहेत. ITC हॉटेल, पेपर बोर्ड, PACKAGING, ऍग्री बिझिनेस, IT, FMCG या क्षेत्रात बिझिनेस करत आहे. ITC चा प्रमुख व्यवसाय सिगारेटचा असला तरी ITC ने बाकीच्या व्यवसायातही चांगले पाय रोवले आहेत. पूर्वी प्रत्येक अंदाजपत्रकात ITC वर भरमसाठ कर लावले जात होते. पण आता काही वेळेला कर वाढवला नाही तर GST च्या कररचनेमध्ये पूर्वी पेक्षा कमी कर द्यावा लागतो. ITC च्या बाकीच्या बिझिनेसमध्ये प्रगती दिसत आहे कायदेशीर अडचणींचा दबाव कमी होत आहे आणि FMCG मधील फायदा वाढत आहे.ITC ऍग्री आणि फूड प्रोसेसिंग क्षेत्रात भरपूर गुंतवणूक करीत आहे.त्यामुळे रीरेटिंगची शक्यता आहे.
MNC फार्मा कंपन्यांची चलती आहे. यामध्ये GSK फार्मा, PFIZER, ABBOTT LAB, सनोफी, प्रॉक्टर & गॅम्बल आणि मर्क, नोव्हार्टीस तसेच अस्त्राझेनेका यांचा समावेश आहे. पण फार्मा क्षेत्रात इतके दिवस या MNC कंपन्यांचा वाटा कमी होता. सरकारने आरोग्यावरचा खर्च वाढवून आरोग्यविषयक योजनांना त्वरित मंजुरी देण्यास सुरुवात केली आहे. त्यामुळे या MNC कंपन्या त्यांची प्रॉडक्ट्स आणि रोगप्रतिबंधक लसी भारतात आणत आहेत.. डॉक्टरांचे प्रिस्क्रिप्शन लागत नाही आणि जी दुकानात सहजपणे उपलब्ध होऊ शकतात अशी ब्रँडेड प्रोडक्ट्स या MNC कंपन्या विकत आहेत.

रिलायन्स इंफ्राने त्यांचा मुंबईतील पॉवर बिझिनेस अडानी ट्रान्समिशनला Rs १८८०० कोटींना विकला.त्यामुळे रिलायन्स इन्फ्राचे कर्ज Rs ७५०० कोटी बाकी राहील. रिलायन्स इन्फ्राला मिळालेल्या आर्बिट्रेशन अवॉर्डमधून Rs ६००० कोटी मिळतील. त्यामुळे सात आठ महिन्यामध्ये कंपनी DEBTFREE होईल असे व्यवस्थापनाने सांगितले.

टाटा केमिकल्समध्ये काही कॉर्पोरेट एक्शन अपेक्षित होती म्हणून मोठ्या मोठ्या म्युच्युअल फंडांनी गुंतवणूक केली होती. ही कॉर्पोरेट एक्शन होत नाही असे पाहिल्याबरोबर म्युच्युअल फंडांनी विक्री करायला सुरुवात केली. त्यामुळे शेअर पडत आहे. त्याविरुद्ध TRIDENT मध्ये प्रमोटर्स पासून सगळ्यांची खरेदी चालू आहे म्हणून शेअर वाढत आहे.

ग्रीव्हज कॉटन ने AMPERE व्हेइकल्स मध्ये ६७% हिस्सा Rs ७७ कोटींना घेतला. त्यामुळे ही कंपनी इलेक्ट्रिक व्हेइकल्सच्या व्यवसायात उतरत आहे असा मार्केटने कयास बांधला.

मॉर्गन स्टॅन्लेने कॅम्लिन फाइन या कंपनीतील आपली हिस्सेदारी विकल्यामुळे हा शेअर पडला. ज्यावेळेला शेअरचे सर्किट वाढवले जाते तेव्हा ते चांगले चिन्ह समजले जाते. AURINPRO या कंपनीचे सर्किट ५% वरून २०% चे केले त्यामुळे शेअरची किंमत चांगलीच वाढली.

चहाच्या किमती Rs २० ते Rs २५ प्रती किलो वाढणार आहेत म्हणून चहाचे शेअर्स तेजीत होते.

विशेष लक्षवेधी

• ६ सप्टेंबर ते २१ सप्टेंबर दरम्यान टी सी एस या कंपनीचा BUY बॅक चालू राहील. ४ सप्टेंबर रोजी इन्फोसिस एक्स बोनस होईल.

वेध उदयाचा

उद्यापासून १४ शेअर्सवर जादा एक्स्पोजर मार्जिन द्यावे लागेल. जून २०१८ साठी GDP चे आकडे जाहीर होतील. ३१ पॉवर कम्पन्यांसाठी बैठक होईल. ३ सप्टेंबर पासून MSCI निर्देशांका मध्ये बदल होतील. पेज इंडस्ट्रीचा समावेश होईल आणि वकरांगी बाहेर पडेल. २५ आणि २६ सप्टेंबरला फेडरल रिझर्व्हची मीटिंग आहे यामध्ये बहुतेक व्याज दर वाढवले जाण्याची शक्यता आहे. एल आय सी आणि IDBI यांच्या डीलच्या संदर्भातील सुनवाई ४ सप्टेंबर रोजी होईल. पुढील महिन्यापासून दुचाकीच्या ( मोटार सायकल आणि स्कुटर्स ) किमती Rs ३००० ने वाढवल्या जातील.थर्ड पार्टी इन्शुअरन्स मुळे या किमती वाढवाव्या लागत आहेत असा खुलासा कम्पन्यांनी केला. नैसर्गीक गॅसच्या किमती वाढवण्याची घोषणा सरकार उद्या करण्याची शक्यता आहे याचा फायदा ONGC, ऑइल इंडिया, रिलायन्स इंडस्ट्रीज यांना होईल.

BSE निर्देशांक सेन्सेक्स ३८६९० NSE निर्देशांक निफ्टी ११६७६ आणि बँक निफ्टी २८१०३ वर बंद झाले

आज मार्केटमध्ये गोंधळच होता आणि हा गोंधळ काही मूलभूत फरकामुळे होता. आज निफ्टी ५०, निफ्टी नेक्स्ट ५०, मिडकॅप ५० या मधील काही शेअर्स वगळले तर काही नवीन शेअर्सचा समावेश केला. निफ्टी ५० मध्ये २८ सप्टेंबर २०१८ पासून JSW स्टीलचा समावेश असेल तर ल्युपिन या निर्देशांकातून बाहेर पडेल. निफ्टी नेक्स्ट ५० मध्ये बंधन, बायोकॉन, HDFC स्टॅंडर्ड लाईफ, ICICI लोंबार्ड, न्यू इंडिया अशुअरन्स आणि ल्युपिन यांचा समावेश करणार. तर PNB,कमिन्स, इमामी, JSW स्टील, PFC आणि REC यांचा समावेश असणार नाही. मिडकॅप ५० मधून IDFC, PC ज्युवेलर्स, अडानी पॉवर, बायोकॉन, इंजिनिअर्स इंडिया बाहेर पडतील. मिडकॅप ५० मध्ये PNB, कमिन्स आणि ज्युबिलन्ट फूड यांचा समावेश केला जाईल.

असेच बदल निफ्टी मिडकॅप १०० मध्ये ही बदल केले. ९ शेअर्स मध्ये बदल केले. ज्या शेअरचा समावेश केला जातो ते चांगले तर ज्या शेअर्सना वगळले ते शेअर्स वाईट असे गृहीत धरले जाते. म्हणून JSW स्टीलचा शेअर वाढला तर ल्यूपीनचा शेअर पडला.

F & O मधील शेअर्सची तुम्ही फिझिकल डिलिव्हरी घेत असाल तर STT भरावा लागेल. पूर्वी जे पैसे भरावे लागत होते ते Rs १ कोटीच्या व्यवहारावर Rs १००० पडत होत.आता त्यासाठी Rs १०००० भरावे लागतील. मिडकॅपमध्ये ट्रेडिंग करणाऱ्यांना याचा जास्त त्रास होईल. या सर्व गोंधळामुळे प्रत्येकाला आपापली पोझिशन आज आणि उद्या अड्जस्ट करावी लागेल.
IRDA ने विमा पॉलिसीची मार्गदर्शक तत्वे जाहीर केली. ३ वर्ष आणि ५ वर्षाच्या पॉलिसीचे प्रीमियम ताबडतोब भरावे लागतील याचा फायदा GIC RE आणि न्यू इंडिया यांना होईल.

३१ ऑगस्टला YES बँकेचे MD राणा कपूर यांची मुदत संपत आहे त्यांना पुन्हा या पदावर नेमले जाईल की नाही अशी शंका आल्यामुळे येस बँकेच्या शेअरमध्ये अस्थिरता आहे.

SBI ला त्यांचा NSE मधील ३.८९% स्टेक विकण्यासाठी मंजुरी मिळाली. त्याच प्रमाणे SBI च्या कन्सॉरशियमने हिंदुस्थान नॅशनल ग्लासकडून Rs २००० कोटी ९० दिवसात घेण्याचे मान्य केले. त्यामुळे हिंदुस्थान नॅशनल ग्लास ही कंपनी NCLT मध्ये जाण्यापासून बचावली.

USA ने H१B व्हिसासाठी जे निर्बंध लागू केले होते, त्या निर्बंधांची मुदत ५ महिने वाढवली. याचा परिणाम IT क्षेत्रातील सर्व शेअर्सवर झाला.

जेट एअरवेजच्या अडचणी संपलेल्या दिसत नाहीत. जेट एअरवेज आणि गोदरेज बिल्डकॉन लँड डेव्हलपमेंट डीलची आयकर विभाग तपासणी करणार आहे.

केरळच्या पुराचा परिणाम ओणम हा सण साजरा करण्यावर होईल, आणि व्हाइट गुड्ससाठी असलेली मागणी कमी होईल हे विचारात घेऊन हिरोमोटोने केरळसाठी ३०% डिस्कॉउंट जाहीर केला. आणि त्याच प्रमाणे केरळमधील लोकांना कोणताही दुरुस्तीचा चार्ज द्यावा लागणार नाही असे जाहीर केले.

रिलायन्स इन्फ्राचा मुंबईमधील इलेक्ट्रिसिटी वितरणाचा बिझिनेस आज अडाणी ट्रान्समिशनकडे सुपूर्द केला जाईल.
ONGC आंध्र प्रदेशमधील ७२ तेल विहिरिंच्या विस्तारावर Rs ८०० कोटी खर्च करणार आहे.

कॅडीला हेल्थकेअरच्या अडचणी अजूनही संपलेल्या दिसत नाहीत. २० ते २८ ऑगस्ट २०१८ या काळात USFDA केलेल्या इन्स्पेक्शनमध्ये ५ त्रुटी दाखवल्या आणि १५ दिवसात यावर उत्तर देण्यास सांगितले. तोपर्यंत USA मध्ये कोणतीही प्रॉडक्ट्स निर्यात करता येणार नाही असे सांगितले.

विशेष लक्षवेधी

TANFAK या कंपनीचे निकाल चांगले आले. कॅम्लिन फाईन हा शेअर मात्र खूप पडत आहे त्याचे कारण समजू शकले नाही.
आज रुपया US $ १ =Rs ७०.५१ पर्यंत घसरला. हा रुपयाचा US $ बरोबरचा न्यूनतम दार आहे. पुट/कॉल रेशियो २ पेक्षा जास्त झाला होता. व्याजाचा दर, रुपयांचा विनिमय दर आणि कच्च्या मालाच्या किमती ( इंटरेस्ट रेट, INR आणि इनपुट कॉस्ट) अशा ३ गोष्टींवर मार्केटचे लक्ष केंद्रित असेल

वेध उद्याचा

निफ्टी ५० आणि इतर निर्देशांकांची रचना बदलत असल्यामुळे खरेदी विक्री साठी चांगली संधी मिळेल. त्यात उद्या वायदेबाजाराची एक्स्पायरी आहे १,२ सप्टेंबर रोजी ऑटो विक्रीचे आणि सिमेंट विक्रीचे आकडे जाहीर होतील. ज्या शेअरमध्ये रोल ओव्हर जास्त प्रमाणात असेल ते शेअर पुढील महिन्यात चालतात असा एक ढोबळ अंदाज आहे

BSE निर्देशांक सेन्सेक्स ३८७२२ NSE निर्देशांक निफ्टी ११६९१ आणि बँक निफ्टी २८२२४ वर बंद झाले

कोणत्याही अडथळ्यांना जुमानायचे नाही, कशालाही दाद द्यायची नाही असेच जणू मार्केटने ठरवले आहे. रुपया US $ १= ७०.३० पर्यंत घसरला, क्रूड US $ ७६.१४ प्रती बॅरेल, पुट/कॉल रेशियो १.८६ अशी सगळी नकारात्मक स्थिती असतानाही मार्केट पुढे पुढे जात राहिले. आज अडानी ग्रुपचे शेअर्स, MNC फार्मा कंपन्या, खत उत्पादन करणाऱ्या कंपन्या आणि साखर उत्पादन करणाऱ्या कंपन्या यांचे सहकार्य मार्केटला मिळाले.

खत उत्पादन करणाऱ्या कंपन्यांना जी सबसिडी मिळते ती प्रत्येक आठवड्याला DBT योजनेमार्फत मिळेल असे सरकारने जाहीर केले. त्यामुळे RCF, FACT, चंबळ, कोरोमंडल, GSFC, मद्रास फर्टिलायझर अशा खताच्या कंपन्या तेजीत होत्या.
अलाहाबाद हायकोर्टाच्या ऑर्डरनुसार पॉवर कंपन्यांना कोणतेही सहकार्य मिळाले नाही. म्हणून पॉवर कंपन्यांमध्ये कन्सॉलिडेशन होणे गरजेचे आहे असे वाटले. अडानी पॉवर  GMR छत्तीसगढ एनर्जी विकत घेण्याच्या तयारीत आहे.
ट्रम्प हे USA चे अध्यक्ष मेक्सिको आणि USA यांच्या मध्ये भिंत बांधण्याची भाषा करत होते. आता हे वातावरण बदलून USA NAFTA ( नॉर्थ अमेरिकन फ्री ट्रेंड अग्रीमेंट)  करायला तयार झाले आहे. या अग्रीमेंटमुळे  कॅनडावर दबाव येईल, नवीन तरतुदी  मान्य कराव्या लागतील आणि तंटे मिटवावे लागतील. मेक्सिकोमध्ये ऑटो पार्ट्स बनवणार्या बऱ्याच भारतीय कंपन्या आहेत. त्यांना फायदा होण्याची शक्यता दिसते आहे. यात GNA  ऍक्सल्स, मदर्सन सुमी, मिंडा  इंडस्ट्रीज या ऑटो अँसिलरी क्षेत्रातील कंपन्यांचा यांचा समावेश आहे.

उत्तर प्रदेश राज्य सरकार साखर उद्योगाला  Rs ४९६० कोटी (Rs ५० प्रती टनच्या हिशेबाने) देणार आहे. याचा फायदा UP तील  साखर उत्पादक कंपन्यांना होईल – बलरामपूर चिनी धामपूर शुगर, बजाज हिंदुस्थान…

१५ वर्षांपेक्षा जुन्या गाड्या मोडीत काढाव्यात ( रस्त्यावरून हटवाव्यात) असा आदेश दिल्ली राज्य सरकारने काढला. याचा फायदा मागणी वाढल्यामुळे सगळ्या ऑटो कंपन्यांना होईल.

ICICI प्रुडेन्शियलने  ४० लाख शेअर्स विकून IPO साठी मदत केली हे सेबीला पटले नाही. म्हणून सेबीने नोटीस पाठवली.
गेलचे विभाजन होणार नसून गेल त्यांचा पेट्रोरसायन व्यवसाय विकणार आहे.

जेट एअरवेजच्या  डोक्यावरील टांगती तलवार नाहीसी झाली निकाल खराब आले पण अनिश्चितता संपली आणि जी कॉस्टकटिंग मेजर्स जेटच्या व्यवस्थापनाने सांगितली ती  मार्केटला पटली  आणि शेअर वाढला.